Буюк Британияда “тождор вирус“ инфекцияси билан касалланиб ҳаётдан кўз юмган дастлабки 10 нафар шифокорнинг барчаси асли Осиё, Африка ва Яқин Шарқдан эканлиги аниқланди. Британия тиббиёт уюшмаси раҳбари(NHS) Чаанд Нагпол ҳукуматни нега айнан осиёлик, африкалик ва Яқин Шарқдан келиб чиққанлар COVID-19га бошқаларга нисбатан кўпроқ чалинаётганини аниқлашга чақирди. Бу ҳақда Guardian газетаси маълум қилди.

Айтиб ўтилганидек, ҳалок бўлган дастлабки 10 нафар врачнинг барчаси асли келиб чиқиши Осиё, Яқин Шарқ ва Африкадан бўлган ёки уларнинг авлодларидир. Қайд этилишича, миллий соғлиқни сақлаш тизимида миллий озчилик вакиллари кўпчиликни ташкил этади. Яъни тиббиёт ходимларининг 44 фоизи айнан шу қатлам вакилларидир. 

Маълумот учун, Англия ва Уэльс умумий аҳолисининг 14 фоизини айнан шу тоифадаги инсонлардан иборат.

Чаанд Нагпол вафот этган дастлабки 10 шифокорнинг барчаси айнан шу қатлам вакиллари эканлиги “ўта хавотирли“ эканлигини билдирган.

“Бир қарашда бу қандай содир бўлганини тушуниш қийин“, — деди у. — Боз устига, жонлантириш бўлимида ётганларнинг қарийб учдан бир қисмини ҳам миллий озчилик ташкил этади. Ушбу гуруҳдаги одамлар орасида касалланганлар фоизи ҳам номутаносиб тарзда юқори эканлигидан ҳам хабаримиз бор“.

“Вирус одам танламаслиги ҳақида ҳам эшитдик. Бироқ миллий озчиликка мансуб одамлар ва врачлар орасида вирусга чалиниши кўп эканлиги кузатилмоқда. Бу муаммо ҳал этилиши шарт, ҳукумат ҳозирдан ҳаракатни бошлаши керак“, — дея қўшимча қилган уюшма бошлиғи.

Вафот этган 10 нафар шифокордан ташқари яна ҳаётдан кўз юмган олти нафар ҳамширадан уч нафари, бундан ташқари, шифохона фармацевти ва тиббий ёрдамчи ҳам миллий озчилик вакилларидир. Буюк Британияда ўлим ҳолатларининг миллий келиб чиқиш бўйича кўрсаткичлари шу пайтгача эълон қилинмаган эди. Бироқ олиб борилган тадқиқотлар бўйича шу ҳафта берилган маълумотларга кўра, интенсив терапия бўлинмаларида ҳалок бўлган қарийб 2000 нафар беморнинг 35 фоизи туб аҳоли вакили эмас.

Нагпол миллий озчиликка мансуб тиббиёт ходимлари ўз ҳамкасбларининг ўлими уларни хавотирга солаётганини айтган. NHS раҳбари бу борада ҳали аниқ изоҳ беришга эрта бўлса-да, текширувлар олиб бориш лозимлигини таъкидлаган.

Унинг тахминича, миллий озчиликдан чиққан докторларнинг индивидуал ҳимоянинг ноодатий воситалари бўйича шикоят қилишга унчалик қодир эмасликлари уларни шу хавфга дучор қилган. Ваҳолонки, бошқа тиббий ходимлар айнан шу бўйича жуда кўп норозилик билдиришган.

“Раҳбарият миллий озчиликка мансуб врачларни туб аҳолидан чиққан ҳамкасбларига нисбатан тез-тез таҳқирлайди ва таъқиб қилади, — дейди у. — Улар айбланишларидан қўрқиб, бошқаларга нисбатан икки баробар кам шикоят қилишади“.

У ҳаётдан кўз юмган миллий озчиликка мансуб шифокорларнинг фақат бир нафари хориждан келгани, қолгани шу ерда туғилиб, бутун умрини бошқаларнинг ҳаётини сақлаб қолиш учун соғлиқни сақлаш тизимига бахшида этгани билдирар экан, бу қатламдан чиққан врачларнинг ўлими айнан шу томондан ҳам кишини хафа қилишини қўшимча қилган.

Нагпол ўз жонини қурбон қилган этник озчилик шифокорларининг кўпчилиги ҳаётий шароитлари туфайли ўз иш жойларида қолишга мажбур бўлгани, бу эса интенсив терапия бўлинмаларида уларнинг номутаносиб иштирокига олиб келганини қайд этди.

“Уларнинг ичида уйида қолмай, ўзини хатарга қўйиб, бошқаларнинг ҳаётини сақлаб қолишга қодирлар кўпчиликни ташкил қилади, — дейди у. — Агар мазкур ҳолатга бундай одамлар бир уйда кўплаб қариндош-уруғлари билан бирга туришини қўшсак, улар иш жойидан инфекцияни олиб келиб, оиласининг бир неча нафар оиласига юқтириш ҳам мумкин“.

Уюшма раҳбари, шунингдек, туб аҳоли вакилларига нисбатан миллий озчилик орасида қандли диабет, юрак ва буйрак хасталиклари ҳам кенг тарқалганини таъкидлаган. У мавжуд нотенглик инқироз пайтида янада чуқурлашишига урғу берган. “Коронавирус миллий озчилик ҳамон дуч келаётган тарихий нотенгликни кучайтириб юбориши мумкин“, — деган у.

Соғлиқни сақлаш ва ижтимоий таъминот департаменти эса бунга жавобан жамиятнинг барча аъзоларини ҳимоя қилиш бўйича кучайтирилган ишлар олиб борилаётганини маълум қилган. Хусусан, ўз веб-сайтида Буюк Британиядаги барча 30 миллион уй хўжаликлари орасида тарқатилган ахборот варақалари таржималари билан жойлаштирилганини билдирган.