Криштиану Роналдунинг Саудия Арабистонига кўчиб ўтганига 4 йил бўлди. Бундан роппа-роса 1201 кун олдин “Ал-Наср” клуби оламшумул трансферни амалга оширган эди.

Роналду ва клуб ўртасида тузилган шартнома молиявий жиҳатдан энг йирик шартномалардан бири экани ҳеч кимга сир эмас. Криштиану ушбу жамоада йилига 250 миллион еврога яқин маош олмоқда. Солиштириш учун, унинг “Реал Мадрид” ва “Ювентус”даги маоши 30 миллион евро атрофида бўлган.

Молиявий жиҳатдан ҳаммаси жойида. Ўз навбатида клуб ҳам Роналду трансферидан кўзланган асосий мақсадларига аллақачон етиб бўлган, десак хато бўлмайди. Аммо жамоа мухлислари ҳали ҳамон Роналдудан норози. У келганидан бери “Ал-Наср” бирор марта Саудия Арабистони Про Лигасида чемпион бўла олмади.

Бу ҳолат бевосита Роналдунинг кайфиятига ҳам таъсир ўтказмоқда дейиш мумкин. Роналду максималист футболчи. У ҳар бир ўйинда ғалаба қозонишни истайди. Уни Саудияга фақат пул ишлаш учун келган дейиш нотўғри. Агар шундай бўлганида, у жамоаси билан бу қадар кўп конфликтларга бормасди.

Дарвоқе, Роналду Саудияга кўчиб ўтгач, у билан боғлиқ бир қатор муаммолар ҳам кузатилди. Дастлаб стадионда мухлислар билан тортишувлар бўлди. Рақиб футболчилар провокацияларига учиб, қизил карточка олган ҳолатлар ҳам учради. Шунингдек, у интервьюларида Саудиядаги майдонлар ҳолати, ҳакамлик, VAR тизими, клубнинг ички ишлари ҳамда мамлакатнинг асосий грантларидан бири бўлган фонд “Ал-Наср”дан кўра “Ал-Ҳилол”га кўпроқ эътибор қаратаётганини танқид қилди.

Демак, жамоа соврин юта олмаётгани нафақат мухлисларга, балки Криштианунинг ўзига ҳам ёқмайдиган ҳолат.

Айни пайтда “Ал-Наср” Саудия Арабистони Про Лигасида 28 турдан сўнг 73 очко билан пешқадам бўлиб турибди. Жамоа ўзининг асосий рақиби “Ал-Ҳилол”дан 5 очкога илгарилаб кетган. Турнир якунланишига 6 тур қолганини ҳисобга олсак, бу устунлик чемпионлик масаласи деярли ҳал бўлгандай кўриниши мумкин. Аммо вазият у қадар осон эмас.

“Ал-Наср”ни олдинда жуда мураккаб тақвим кутмоқда. Жамоа 28 апрель куни “Ал-Аҳли”ни қабул қилади. Орадан 4 кун ўтиб “Ал-Қадсия” меҳмони бўлади. Шунингдек, яна 5 кундан кейин энг муҳим ўйинлардан бири — азалий рақиб “Ал-Ҳилол”га қарши баҳс ўтказади.

Кўриниб турибдики, “Ал-Наср” учун ҳал қилувчи босқич энди бошланмоқда. Шу билан бирга, Симоне Инзаги бошқараётган “Ал-Ҳилол” тақвими анча қулай — улар сўнгги турларда “Ал-Наср”дан ташқари TOP-7 жамоаларига қарши ўйнамайди.