Пандемия Ўзбекистонда ҳам тадбиркорлик фаолиятига жиддий таъсир кўрсатди. Ҳукуматимиз томонидан кўрилган чора-тадбирлар натижасида коронавируснинг салбий таъсирини юмшатиш, тадбиркорлик субъектларини қўллаб-қувватлаш бўйича бир қатор солиқ имтиёзлари ва преференциялар белгиланганлиги бу борадаги оқсашнинг олдини олди. 2020 йилнинг 30 декабрь кунги «2021 йил учун Ўзбекистон Республикасининг давлат бюджети тўғрисида»ги Ўзбекистон Республикаси қонуни қабул қилинганлиги муносабати билан Солиқ кодексига ўзгартириш ва қўшимчалар киритилиши тадбиркорлик фаолиятини янада шакллантириш имконини берди. Андижон вилоятида тадбиркорлик субъектлари иштирокида бўлиб ўтган тадбирда 2021 йилнинг 1 январь кунидан бошлаб фаолиятга кириб келган ўзгаришлар ҳақида фикр юритилди.

— Бундан буён Қорақалпоғистон Республикаси Жўқорғи Кенгеси ва вилоятлар халқ депутатлари Кенгашларига туристик зоналарда жойлашган алоҳида санаторий-курорт объектлари эгаллаган ер участкаларига нисбатан мол-мулк солиғи ва ер солиғининг камайтирилган ставкаларини белгилаш ёки солиқ тўлашдан озод қилиш ҳуқуқи берилди, — дейди Давлат солиқ қўмитаси раисининг ўринбосари Мубин Мирзаев. — Мисол учун, Андижон вилояти Хонобод шаҳрида жойлашган «Хонобод сиҳатгоҳи» санаторийсининг ер майдони 2 гектарни ташкил қилгани боис 66,0 млн. сўм ер солиғи тўлаши лозим, лекин бу миқдорни Андижон вилоят халқ депутатлари Кенгаши камайтириши ёки умуман солиқ тўлашдан озод қилиши мумкин.

Йиғилишда таъкидланганидек, эндиликда ҳар бир ўзини банд қилган жисмоний шахсга қўшимча пенсия таъминотини кафолатлаш ҳуқуқи берилди. Яъни, бу тоифа фуқаролар ихтиёрий тарзда тўлаган ижтимоий солиғига қараб, биринчидан, меҳнат стажи ҳисобланишига, иккинчидан, қўлга оладиган пенсия миқдорини ўзгартиришга эришадилар. Бу каби ўзгартиришлар Андижон вилоятидаги мавжуд 60 минг 311 нафар ўзини ўзи банд қилган ҳамюртларимиз каби фуқаролар учун катта имконият, ҳисобланади.

Қонун ва қонуности ҳужжатларига доир бу каби тадбирлар тадбиркорларнинг ҳуқуқий билимини шакллантириб, фаолиятларини тўғри ташкиллаштиришларида муҳим аҳамият касб этмоқда.

Саминжон ҲУСАНОВ,
«Халқ сўзи»