Туркия президенти Ражаб Тоййиб Эрдўған 3 апрель куни миллатга мурожаат қилиб, мамлакатда коронавирус тарқалиши олдини олиш учун янги карантин чоралари киритилишини эълон қилди.

“Ярим тундан бошлаб 15 кунга ўпка касалликлари кенг тарқалган 30 та шаҳар ва Зонгулдак вилоятига кириш-чиқиш тақиқланади. 20 ёшдан кичиклар учун комендантлик соати киритилади. Одамлар тўпланадиган жойларда, жумладан, супермаркетлар, бозорлар ва иш жойларида ниқоб тақиш шарт.

Карантин талабларини бажармаганларнинг барчасига маъмурий жазо ва жиноий жавобгарлик иккиланмасдан қўлланилади. Мен ўз миллатимга ишонаман! Қоидаларни қанчалик яхши бажарсак, вазиятни шунча кўп назорат қиламиз ва таҳдидга қарши тура оламиз”, деди президент.

Туркия президенти, шунингдек, ижтимоий масофалашувга риоя қилишга чақирган ва кўчада бир-бирига 3 қадамдан камроқ масофада яқинлашмаслик кераклигини таъкидлаб ўтган.

Эслатиб ўтамиз, Туркияда коронавирусга чалиниш бўйича илк ҳолат 10 мартда қайд қилинган. Ҳозирда касалланганлар сони 21 мингга яқинни, вафот этганлар 425 нафарни ташкил қилмоқда. 484 киши вирус чақирадиган касалликдан соғайган.