11 ойда Ўзбекистонга ташриф буюрган сайёҳлар сони илк бор 10 миллиондан ошди
2025 йилнинг январь–ноябрь ойларида Ўзбекистонга туристик мақсадларда ташриф буюрган чет эл фуқаролари сони илк бор 10 миллионлик маррани ортда қолдириб, жами 10,7 миллион нафарни ташкил этди. Бу ҳақда Миллий статистика қўмитаси маълум қилди.
Қайд этилишича, Ўзбекистонга энг кўп туристлар Қирғиз Республикасидан келган бўлиб, уларнинг сони 3 миллион нафарга етган. Ундан кейинги ўринда Қозоғистон ва Тожикистон жойлашган бўлиб, ҳар икки давлатдан ҳам 2,5 миллион нафардан сайёҳ ташриф буюрган.
Шунингдек, Россия Федерациясидан келган туристлар сони 923,8 минг нафарни, Афғонистондан эса 429,4 минг нафарни ташкил этган. Кейинги ўринларда Туркманистон (341,4 минг нафар), Хитой (250,5 минг нафар) ва Туркия (161,9 минг нафар) қайд этилган.
ТОП-10 рўйхатдан, шунингдек, Ҳиндистон (73,4 минг нафар) ва Корея Республикаси (44,1 минг нафар) ўрин олган.
Миллий статистика қўмитаси маълумотларига кўра, ушбу кўрсаткич ўтган йилнинг мос даври билан солиштирилганда 3,5 миллион нафарга, ёки 47,4 фоизга ошган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг