Gigiyenik talablarga koʻra, oʻquvchi-sportchilar uchun oziq-ovqat ratsioni bir qator asosiy gigiyenik talablarga javob berishi kerak.

Jumladan:

— ratsionning kunlik kaloriya miqdori sportchining energiya sarflariga mos kelishi;

— ratsionning kimyoviy tarkibi, kaloriya miqdori va hajmi sport turini hamda tayyorgarlik davrini hisobga olgan holda oʻquvchi-sportchi organizmining ehtiyojlari va xususiyatlariga mos kelishi;

— oziq-ovqat tarkibidagi oqsillar, yogʻlar va uglevodlar balanslashgan boʻlishi, ularning miqdori sport turini va mashgʻulot jarayonining intensivligini hisobga olgan nisbatlarda boʻlishi;

— kundalik ratsionda oʻsimlik va hayvon mahsulotlarining keng assortimenti boʻlishi;

— oziq-ovqat zararsiz (zaharli moddalar va patogen bakteriyalarni oʻz ichiga olmagan holda) boʻlishi.

Shuningdek, ushbu Gigiyenik talablar bilan sport turlari bilan shugʻullanuvchi oʻquvchi-sportchilar uchun kunlik talab etiladigan kaloriya va asosiy ozuqaviy moddalar (oqsil, yogʻ va uglevodlar), kunlik vitamin va mineral moddalar miqdorlari belgilanmoqda.

Bundan tashqari, Gigiyenik talablarda oʻquvchi-sportchilar uchun ratsionni tuzishda mahsulotlarga ishlov berish usuli, oshqozonda ozuqaviy moddalarni hazm qilish vaqti, ularning ichaklarda harakatlanish tezligi va mahsulotlarning organizmda soʻrilishi hisobga olinishi shartligi nazarda tutilmoqda.