Jahongir BOYMURODOV/“Xalq soʻzi”. Qashqadaryo viloyat hududiy saylov komissiyasining navbatdagi majlisi boʻlib oʻtdi. Videokonferensiya tarzida oʻtkazilgan majlisda tuman va shahar saylov komissiyalarini tuzish toʻgʻrisidagi masala koʻrib chiqildi.

Maʼlumki, saylov kodeksining 19-moddasiga koʻra, tuman, shahar saylov komissiyalari aʼzoligiga nomzodlar Xalq deputatlari tuman va shahar Kengashlarining majlislarida muhokama qilinadi hamda hududiy saylov komissiyasiga tasdiqlash uchun tavsiya etiladi.

Shunga koʻra, Qashqadaryo viloyatining 2 shahar va 14 tuman Kengashi tomonidan tuman va shahar saylov komissiyalari aʼzoligiga nomzodlar tarkibi shakllantirilib, tasdiqlash uchun viloyat hududiy saylov komissiyasiga taqdim etilgan.

— Majlisda har bir nomzod aholi oʻrtasida obroʻ-eʼtibor qozongan, oʻtgan saylovlarda tajribasi bor, fidoyi, tashkilotchi rahbarlar va faollar orasidan saralab olingani qayd etildi, — deydi hududiy saylov komissiyasi aʼzosi Adiba Shaymanova. — Hududiy saylov komissiyasi nomzodlarni koʻrib chiqib, ularni tasdiqlash toʻgʻrisida qaror qabul qildi.

Majlisda tuman va shahar saylov komissiyalarining vazifalari va vakolatlari haqida batafsil tushunchalar berildi.