IIV huzuridagi Jazoni ijro etish departamenti va jazoni ijro etish muassasalaridagi tashkiliy boʻlim (boʻlinma) xodimlari uchun Ichki ishlar vazirligi huzuridagi Jazoni ijro etish departamenti oʻquv-seminar tashkil etildi.

Mazkur seminarda trener sifatida Oliy Majlisning Inson huquqlari boʻyicha vakili (ombudsman) Kotibiyatining Qiynoqqa solish va boshqa shafqatsiz, gʻayriinsoniy yoki qadr-qimmatni kamsituvchi muomala hamda jazo turlarining oldini olish boʻlimi xodimlari ishtirok etishdi.

Oʻquv-seminardan koʻzlangan maqsad, jazoni ijro etish muassasalari rahbarlari va xodimlariga jazoni ijro etish muassasi faoliyatiga oid xalqaro standartlar va ilgʻor xorijiy tajribalar, xususan, jazoni ijro etish muassasalarida qonuniy tarzda tartib-intizomni taʼminlash, yopiq muassasalarda saqlanayotgan shaxslarning huquqlarini taʼminlashda samaradorlikka erishish yuzasidan koʻnikmalarni oshirishdan iboratdir.

Tadbirda Oliy Majlisning Inson huquqlari boʻyicha vakili (ombudsman) huzuridagi qiynoqlarning oldini olish boʻyicha Milliy preventiv mexanizm doirasida amalga oshirilayotgan ishlar va jazoni ijro etish muassasalariga amalga oshirilayotgan monitoring tashriflari toʻgʻrisida maʼlumot berilib, monitoring guruhlarida fuqarolik jamiyati instituti vakillari hamda Oliy Majlis Qonunchilik palatasi deputatlari va Senat aʼzolari ishtirok etayotgani taʼkidlandi.

Seminar qizgʻin muhokamalar, bahs-munozaralar, taklif-mulohazalar, savol-javoblarga boy boʻldi. Ishtirokchilar oʻzlarini qiziqtirgan savollarga atroflicha javob olishdi.