“Oʻzbekiston Respublikasida COVID-19 pandemiyasi davrida umumiy oʻrta taʼlim maktablari va oʻrta maxsus maktab internatlarining faoliyatini tashkillashtirish boʻyicha vaqtinchalik sanitariya-epidemiologik talablar” Adliya vazirligida huquqiy ekspertizadan oʻtkazildi va hisobga olindi. Bu haqda "Huquqiy axborot" kanali xabar berdi.

Mazkur hujjat COVID-19 pandemiyasi davrida mulkchilik shaklidan qatʼiy nazar, barcha umumtaʼlim maktablari va maxsus maktab internatlarning xavfsiz ish muhitini taʼminlashga qaratilgan ish faoliyatiga tatbiq etiladi.

Hujjatda, jumladan, quyidagilar nazarda tutilgan:

— mashgʻulotlarni soat 8:00 dan soʻng boshlash va 17.30 dan kechiktirmasdan tugatish tavsiya etiladi, mashgʻulotlar uch smenada tashkillashtirilishi mumkin;

— pandemiya davrida ommaviy tadbirlar (yigʻilishlar, konsertlar, tugʻilgan kunlar va shu kabilar) oʻtkazish vaqtincha toʻxtatiladi;

— barcha bolalar va ularning qonuniy vakillari niqoblarda kelishlari shart;

— maktabga kirishdan avval, maktabning tibbiy xodimlari/masʼul xodimlari tomonidan “ertalabki filtrlash” boʻyicha maxsus punkt tashkil etilib, tegishi jurnal yuritiladi;

— “ertalabki filtrlash” jarayonidan soʻng, oʻquvchilar kirish joylarida oʻrnatilgan maxsus dispanserdan antiseptik vosita yordamida qoʻllarini zararsizlantiradilar;

— niqob/respiratorsiz maktabga kirishiga ruxsat berilmaydi. Bunda, niqob kamida har 3 soatda, respiratorlar kamida xar 8 soatda oʻzgartirilishi lozim;

— sinflarda har bir oʻquvchiga 2 m² dan kam boʻlmagan maydon boʻlishi talab etiladi;

— pandemiya paytida maktab oshxonalari oʻz ishini amaldagi sanitariya meʼyorlari va qoidalari talablariga rioya qilingan holda tashkil etadi;

— yuqumli kasalliklar belgilari boʻlgan oʻquvchilar/maktab xodimlari ushbu belgilar aniqlangan vaqtdan boshlab tez yordam guruhi yoki ota-onalar (qonuniy vakil) kelguniga qadar zudlik bilan izolyatsiya qilinishlari shart.

Eslatib oʻtamiz, avvalroq pandemiya davrida bogʻchalarga qoʻyiladigan sanitariya talablari Adliya vazirligida huquqiy ekspertizadan oʻtkazilib, hisobga olingan edi.