2024-yilning boshida Navoiy, Qarshi, Nukus va Termiz aeroportlarida Davlat soliq qoʻmitasi tomonidan joriy etilgan “Tax Free” xizmatining tantanali ochilish marosimi boʻlib oʻtdi va ular oʻz faoliyatini boshladi.

“Tax Free” tizimi xorijiy fuqarolarga Oʻzbekistonda chakana savdo bilan shugʻullanuvchi tadbirkorlardan ayrim turdagi tovarlarni xarid qilishda toʻlangan QQS summalarini qaytarishni nazarda tutadi. Keshbek toʻlovi amalga oshiriladigan tovarlar roʻyxati Vazirlar Mahkamasining 2022-yil 8-noyabrdagi qarorida belgilangan. Bular qatoriga suvenirlar, yongʻoqlar, mevalar va quritilgan mevalar, charm va moʻynali mahsulotlar, gilamlar, toʻqimachilik mahsulotlari va boshqalar kiradi.

QQS toʻlovini qaytarish uchun “Soliq” mobil ilovasida roʻyxatdan oʻtish va amalga oshirilgan xaridlar chekini skanerdan oʻtkazish kerak. Aeroportdan joʻnab ketayotganda, yoʻlovchi reysga roʻyxatdan oʻtishi kerak, soʻngra bortga chiqish talonini va tovarlarning oʻzini koʻrsatgan holda u “Tax Free” xizmatiga murojaat qilishi lozim. “Tax Free” tizimida roʻyxatdan oʻtgan tovarlarni qoʻl yuki sifatida qoldirish yoki uni reysga roʻyxatdan oʻtish peshtaxtasiga qaytarib, bagaj sifatida olib oʻtish mumkin.

“Tax Free” xizmatidan foydalanish uchun tovarlarning umumiy xarid summasi kamida 1 million soʻm boʻlishi kerak. Bundan tashqari, mahsulot ochilmasligi yoki ishlatilmasligi lozim. Soliq qoʻmitasi xodimlari mahsulotning barcha mezonlarga javob berishini tekshirgandan soʻng, keshbek rasmiylashtiradi. Turli toifadagi tovarlar uchun yoʻlovchi QQS summasining 90 foizigacha qaytarishi mumkin. Keshbek yoʻlovchining kartasiga rasmiylashtiriladi va toʻlovni qaytarish roʻyxatga olingan oydan keyingi oyning 25-kunidan keyin amalga oshiriladi.

Bugungi kunda “Tax Free” tizimi Oʻzbekistonning 9 ta xalqaro aeroportlarida: Toshkent, Samarqand, Buxoro, Fargʻona, Urganch, Navoiy, Qarshi, Nukus va Termizda joriy etilgan.