Joriy yil 26-mart kuni Oliy Majlis Senatining Yoshlar, xotin-qizlar, madaniyat va sport masalalari qoʻmitasi raisi Orzigul Qozixonova boshchiligidagi Oʻzbekiston parlamenti delegatsiyasi Ashxobod shahrida gender tenglikni taʼminlash va gender asosidagi zoʻravonlikka qarshi kurashish sohasida qonunchilik asoslarini mustahkamlashga bagʻishlangan parlamentlararo muloqotda ishtirok etdi.

Tadbir Turkmaniston Majlisi tomonidan BMTning Aholishunoslik jamgʻarmasi (UNFPA) bilan hamkorlikda xalqaro tashkilotlar va sakkiz davlat parlamentlari vakillari ishtirokida tashkil etildi.

Muloqot davomida Oʻzbekiston delegatsiyasi aʼzolari xotin-qizlar huquqlarini taʼminlash boʻyicha qonunchilik va institutsional mexanizmlarni takomillashtirish boʻyicha milliy tajribani taqdim etdi, bunda gender asosidagi zoʻravonlikning oldini olish va unga qarshi kurashish masalalariga alohida eʼtibor qaratildi.

Zamonaviy tahdidlarga, shu jumladan, kiberbulling, onlayn tahdidlar va psixologik bosim kabi zoʻravonlikning yangi shakllari tarqalishiga qarshi samarali javoblarni ishlab chiqish zarurligiga alohida eʼtibor qaratildi. Qonunchilikni yanada moslashtirish, raqamli himoya vositalarini qoʻllashni kengaytirish, shuningdek, parlamentlarning bu boradagi rolini kuchaytirish muhimligi qayd etildi.

Bundan tashqari, Oʻzbekiston delegatsiyasi mamlakatimizda xotin-qizlar va bolalarni himoya qilish tizimini kuchaytirish, ijtimoiy qoʻllab-quvvatlash mexanizmlarini rivojlantirish va zoʻravonlikning oldini olish maqsadida idoralararo hamkorlik samaradorligini oshirishga qaratilgan keng koʻlamli islohotlar haqida xabardor qildi.