Joriy yilning 4 — 7-sentyabr kunlari Oliy Majlis Senati Raisi Tanzila Norboyeva boshchiligidagi Oʻzbekiston delegatsiyasi rasmiy tashrif bilan Belarus Respublikasiga boradi.

Tashrif mobaynida Oʻzbekiston – Belarus biznes doiralari va tadbirkor ayollar birinchi biznes-forumi boʻlib oʻtadi.

Forum doirasida “Tadbirkorlikdagi ayollar – Belarus va Oʻzbekiston oʻrtasidagi ishbilarmonlik hamkorligini rivojlantirish salohiyati” mavzusida yalpi majlis, koʻrgazmalar va oltita tematik seksiya yigʻilishlari tashkil etilishi rejalashtirilgan.

Tadbirlarda Oʻzbekiston tomonidan sanoat korxonalari, qishloq va fermer xoʻjaliklari, oziq-ovqat, farmatsevtika sanoati, madaniy-gumanitar, shuningdek, turizm va transport kompaniyalari vakillari ishtirok etadilar.

Forum yakunida bir qator muhim hujjatlar, shu jumladan tijoriy kelishuv va shartnomalar imzolanishi koʻzda tutilgan.

Eslatib oʻtamiz, 2022-yilning 29-iyun – 2-iyul kunlari Oliy Majlis Senati Raisi Tanzila Norboyeva boshchiligida Oʻzbekiston tadbirkor ayollari delegatsiyasi rasmiy tashrif bilan Ozarbayjon Respublikasida boʻlib, Oʻzbekiston va Ozarbayjon tadbirkor ayollarining birinchi biznes-forumi oʻtkazilgan edi. Uning natijalariga koʻra, 54 mln dollardan ortiq miqdorda shartnoma va memorandumlar imzolangan.