Foto: president.uz

Prezident raisligida yigʻilish boʻlib oʻtmoqda. Bu haqda Prezident matbuot kotibi Sherzod Asadov xabar berdi.

“Oʻquv yili deyarli yakunlandi. Oldimizda 404 ming nafar oʻrta taʼlim, 151 ming nafar kasb-hunar taʼlim, 125 ming nafar oliygoh bitiruvchilari, jami 680 ming nafar yoshlarning bandligini taʼminlash boʻyicha muhim vazifa turibdi”, dedi Prezident.

Shu maqsadda barcha hokimlar:

— bitiruvchilar bilan shaxsan uchrashadi;

— ijtimoiy tarmoqlar va OAV orqali uchrashuvlarning aniq vaqti, joyi va telefonlarini eʼlon qiladi;

— uchrashuvlarda rektorlar, yirik ish beruvchilar, korxona va klasterlar, mutasaddi idoralar rahbarlari ham ishtirok etadi;

— bitiruvchilarning ishga ehtiyoji, qiziqishi va koʻnikmalarini oʻrganib, ularning balansini shakllantiradi;

— ish beruvchilarning ehtiyojidan kelib chiqib, monomarkazlarda kasbga tayyorlashni tashkil etadi.

Bu ishlarni amalga oshirish uchun joylarda doimiy ishlaydigan shtablar tuzilishi, ular ijtimoiy tarmoqlar orqali yoshlar va ularning ota-onasi bilan tizimli muloqotni yoʻlga qoʻyishi, kelib tushadigan har bir murojaat tezkor koʻrib chiqilishi shartligi belgilandi.

Yigʻilish yakunida mutasaddilar axborot berdi.