Foto: Халқ сўзи

“Oʻrgatuvchi” belgisi qoʻyilgan yengil mashinada avtomotohavaskorlarga haydovchilik boʻyicha amaliy mashgʻulot oʻtkazayotgan bu ayolni Namangan viloyatining Norin tumani yoʻllarida deyarli har kun uchratasiz. U “Vatanparvar” tashkilotining tumandagi oʻquv sport-texnika klubi tajribali usta oʻrgatuvchisi Muqaddamxon Sultonovadir. Tizimga ilk bor kirib kelgan ayollardan boʻlgan mahoratli mutaxassis oʻz kasbining fidoyisi.

— Ilgari avtomobil haydash faqat erkaklarning ishi deya hisoblangan boʻlsa, endilikda ayollarning rulni chapdastlik bilan boshqarishiga ham koʻzimiz oʻrganib qoldi, — deydi M. Sultonova. — Oʻz navbatida avtomaktablardagi ayol oʻrgatuvchilar safi ham kengayib bormoqda. Ayni paytda viloyatimizda ular soni 6 nafarga yetgan.

Mahoratli oʻrgatuvchi ustaning mehnatlari mahsuli undan puxta saboq olib, yoʻl harakati qoidalariga qatʼiy amal qilib harakatlanayotgan minglab intizomli haydovchilar timsolida yaqqol koʻzga tashlanadi. Xalqaro xotin-qizlar kuni arafasida koʻplab ustozlar qatori Muqaddamxon Sultonovaga ham shogirdlari bayram bilan qutlab guldastalar tutishdi.

Qudratilla NAJMIDDINOV, “Xalq soʻzi”.