Foto: “Xalq so‘zi”

"Namangan suv ta’minoti"  mas’uliyati cheklangan jamiyati  tasarrufidagi  “Qizil Rovot” suv olish inshooti  Namangan shahri, Uychi, Chortoq va Yangiqo‘rg‘on tumanining viloyat markaziga yondosh qismiga  toza ichimlik suv yetkazib berishga xizmat qiladi. Bu yerda uchta  energotejamkor nasos agregatlarini o‘rnatilib, dastlabki sinovdan o‘tkazildi. Texnologik yangilanish ishlari, jumladan,  zamonaviy agregatlar, zadvijka, zatvor va maxsus klapanlarni sotib olish,  ularni o‘rnatish va boshqa zarur tadbirlar uchun respublika byudjeti, “O‘zsuvta’minot” hamda “Namangan suv ta’minoti” mas’uliyati cheklangan jamiyatlari hisobidan hammasi bo‘lib 11,5 milliard so‘m mablag‘ yo‘naltirildi.

Ma’lumot uchun, hozirgacha “Qizil Rovot” suv olish inshooti orqali  iste’molchilarga  suv yetkazib berishda yuqori energiya sarflovchi  ikkita   nasosdan foydalanilayotgan edi. Endilikda ular yoniga uchta tejamkor agregatlar qo‘shilishi  bilan  quvvatlar  sarfida keskin o‘zgarish yasaldi.  Pirovard  natijada, soatiga 500 kVt, bir kecha kunduzda 1200 kVt va yil davomida 4380000 kVtdan ko‘proq  elektr energiyasini tejab qolish imkoniyati yuzaga keldi. Bu bilan 2 milliard  so‘mdan ko‘proq mablag‘ iqtisod qilinadi.

Qudratilla NAJMIDDINOV

   “Xalq so‘zi”.