Foto: "Xalq so'zi"

Bugun oʻtkazilgan  anʼanaviy “Prezident  archasi” bayram tomoshalari namanganlik bolajonlarga  ham bir olam quvonch hadya etdi.

Namangan viloyat Yoshlar markazida boshlangan tantanali tadbirga  oilaviy bolalar uylari, Vatan sarhadlarini himoya qilish yoʻlida qurbon boʻlgan harbiy xizmatchilar farzandlari, oilaviy bolalar uylari hamda ijtimoiy himoyaga muhtoj oilalarning 3-15 yoshli  oʻgʻil-qizlari taklif etildi.

Shunday qilib bayramning 200 nafardan ziyod ishtirokchilarini viloyat hokimi Shavkat Abdurazzoqov Yangi yil ayyomi bilan muborakbod etib, ularga ezgu tilaklar bildirdi. Jamoatchilik vakillari ishtirokida  bolajonlarning har biriga   tarkibida 16 turdagi  shirinlik, ikki  turdagi oʻquv qurollari va Bolajonlar ensiklopediyasi hamda uch turdagi boshqa hadyalar kiritilgan “Prezident sovgʻasi” topshirildi.  12 yoshdan oshgan 13 nafar oʻgʻil-qizga esa planshetlar ham tuhfa qilindi. Sahnadagi betakror tomoshalar, “Yangi yil orzusi” nomli teatrlashtirilgan bayram dasturi murgʻak qalb egalarini zavqli sarguzashtlarga oshno etdi.

Qudratilla NAJMIDDINOV, “Xalq soʻzi”.