Kecha, 19-oktyabr kuni Angliya Premyer-ligasining 8-turidan oʻrin olgan bahslar yakunlandi. Kun doirasidan oʻrin olgan oʻyinda “Liverpul” jamoasi oʻz maydonida musobaqa jadvalida 13-oʻrinda boʻlgan “Manchester Yunayted” klubini qabul qildi.

Uchrashuvda hisob 2-daqiqadayoq mehmonlar tomonidan ochildi. “Qizil iblislar” hujumchisi Brayan Mbeumo jamoadoshi Amad Dialloning uzatmasidan soʻng gol kiritdi. Oʻyinning birinchi boʻlimi 0:1 hisobida yakunlandi.

Ikkinchi boʻlimning 78-daqiqasida Kodi Gakpo hisobni tenglashtirdi. Ammo bu yakuniy natija boʻlmadi.

84-daqiqada “Manchester Yunayted” gʻalaba golini kiritdi. Jamoa sardori Harri Maguayr gʻalaba goliga mualliflik qildi.

Shu tariqa “Liverpul” klubi qatorasiga toʻrtinchi magʻlubiyatini qabul qilib oldi. Jamoa soʻnggi bor 24-sentyabr kuni Angliya Liga kubogi musobaqasidan oʻrin olgan bahsda “Sautgempton”ni magʻlubiyatga uchratgan edi.

“Liverpul” — “Manchester Yunayted” 1:2

Gollar: Gakpo (78) — Mbeumo (2), Maguayr (84).

“Liverpul”: Mamardashvili, van Deyk, Konate, Kerkez, Soboslai, Isak (Kyeza, 72), Mak Allister, Saloh (Frimpong, 87), Bredli (Virts, 62), Gakpo, Gravenberh (Jons, 62).

“Manchester Yunayted”: Lammens, Dalot, de Ligt, Maguayr, Maunt (Sheshko, 61), Fernandesh (Maynu, 87), Kunya, Amad (Dorgu, 58), Kazemiro (Ugarte, 58), Mbeumo, Shou (Yoro, 87).