Kuz manzaralari
Abdulla ORIPOV,
Oʻzbekiston Qahramoni, xalq shoiri
Yana dalalarga boshlaydi havas,
Bogʻlarda xazonlar yonadi lov-lov.
Doʻstlarim, bu kuzning barglari emas,
Mening yuragimdan toʻkilgan olov.
Shoxlarda mezonlar yaltirar xira,
Poyida shivirlar mening kuylarim.
Doʻstlarim, bular ham mezonmas sira,
Bu mening chuvalgan, soʻngsiz oʻylarim.
Quyosh ham falakda bamisli roʻyo,
U endi yondirmas, yaltirar faqat.
Doʻstlar, u ham endi quyoshmas aslo,
U olis yoshlikda qolgan muhabbat.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring