“Huquqiy axborot” telegram kanali vaksinatsiyalash majburiy qilib belgilangan davlatlar haqida maʼlumot berdi.

Avstraliya

Joriy yil iyun oyini oxirida karantinli mehmonxonalarda keksa yoshdagi ishchilar va xizmatchilar uchun COVID-19 vaksinasi bilan emlash majburiy qilindi. Tokioga boradigan parolimpiya sportchilari uchun emlanish majburiy qilingan.

Angliya

“Qariyalar uyi” ishchilari uchun oktyabr oyidan boshlab koronavirusga qarshi emlash majburiy boʻladi.

Fransiya

2021-yil 12-iyuldan barcha sogʻliqni saqlash xodimlari, kinoteatrga kirmoqchi yoki poyezdga chiqmoqchi boʻlganlar emlanganligi toʻgʻrisida hujjatni yoki kovidga chalinmaganligi boʻyicha salbiy test natijasini koʻrsatishi shart.

Gretsiya

2021-yil 12-iyuldan qariyalar uyi xodimlari emlanishi majburiy, sentyabr oyidan faqat vaksina olgan fuqarolar barlar, kinoteatrlar, teatrlar va boshqa yopiq joylarga kirishiga ruxsat berilgan.

Indoneziya

2021-yil fevral oyidan emlash majburiy ravishda amalga oshirilmoqda. Indoneziya poytaxti Jakartada vaksina olishdan bosh tortganligi uchun 5 mln rupiya (357 AQSH dollari)gacha jarima qoʻllanilishi belgilangan.

Italiya

2021-yil mart oyida sogʻliqni saqlash xodimlari, shu jumladan farmatsevtlar majburiy emlangan. Rad etganlarga yil davomida maosh berilishi toʻxtatilgan.

Qozogʻiston

2021-yil iyun oyidan 20 dan ortiq sohada ishlaydigan odamlar majburiy emlangan, emlashdan bosh tortganlarda haftalik sinovlar oʻtkazilgan.

Polsha

2021-yil avgust oyidan boshlab xavf yuqori boʻlgan ayrim toifadagi odamlar uchun emlashni majburiy amalga oshirish rejalashtirilgan.

Rossiya

Moskvada 2021-yil iyun oyining oxiridan kafe, bar va restoranlarga faqat emlanganlar yoki kovidga chalinmaganligi toʻgʻrisida salbiy test natijasi mavjud boʻlganlar kirishiga ruxsat berilgan.

Saudiya Arabistoni

2021-yil may oyidan ish joyiga borib ishlash uchun davlat va xususiy sektor ishchilari majburiy emlanishi belgilangan (bunga muddat belgilanmagan). Shuningdek, 1-avgustdan boshlab har qanday davlat, xususiy yoki taʼlim muassasalariga kirish, jamoat transportidan foydalanish uchun majburiy emlanish belgilanmoqda.