Foto: president.uz

Prezident huzurida elektrotexnika sohasida yangi zaxiralarni safarbar qilish boʻyicha yigʻilish boshlandi. Bu haqda Prezident matbuot kotibi Sherzod Asadov xabar berdi.

Ushbu tarmoqda yaratilgan shart-sharoitlar natijasida oʻtgan besh yilda:

— 465 million dollarlik investitsiyalar oʻzlashtirilib, 163 ta yangi loyiha ishga tushirilgani;

— ishlab chiqarish hajmi 4 barobarga (4 trillion soʻmdan 17 trillion soʻmga), eksport esa 3 barobarga (190 million dollardan 565 million dollarga) oshgani;

— tarmoqda ish oʻrinlari soni 2 barobarga oshib, 32 mingtaga yetgani taʼkidlandi.

«Lekin bu hali juda kam. Taraqqiyot dasturida 2026-yilga qadar elektrotexnika mahsulotlari ishlab chiqarish hajmini 2 baravarga, eksportni 3 baravarga oshirishni maqsad qilganmiz.

Kelgusi yillarda mis ishlab chiqarish hajmi 2 baravarga oshadi. Uni oʻzimizda chuqur qayta ishlab, raqobatdosh tayyor mahsulotlarni eksportga yoʻnaltirish zarur», dedi Prezident.

Buning uchun “taʼlim – innovatsiya – ishlab chiqarish – servis” yaxlit zanjirini oʻz ichiga olgan sanoat klasteri tashkil etish shartligi koʻrsatib oʻtildi.