Foto: Reuters

Turkiya prezidenti Rejep Tayyip Erdogʻan Isroil oʻn mingga yaqin Falastin fuqarosini asirda ushlab turganini aytdi.

“Isroil oʻn mingga yaqin falastinlikni garovda ushlab turibdi. Germaniya bu odamlarni ozod qilish uchun choralar koʻrsin, keyin biz HAMAS qoʻlidagilarni ozod qilish uchun harakat qilamiz”, dedi Erdogʻan. Uning soʻzlariga koʻra, Germaniya bunday qadamga rozi boʻlmagan. 

Avvalroq, Erdogʻan isroilliklar HAMAS tomonidan garovga olinganlarni ozod qilish uchun Turkiyadan yordam soʻra boshlaganini aytgandi. Erdogʻanning soʻzlariga koʻra, Anqaraga yordam soʻrab murojaat qilgan garovga olinganlarning yaqinlari orasida Isroilning tinch aholiga qarshi repressiyalari qurbonlari ham bor.

Avvalroq, Isroil “50/50” formulasidan foydalangan holda garovga olinganlarni ozod qilish boʻyicha HAMAS bilan kelishuvni rad etgan edi.

Gʻazo sektoridagi qarama-qarshilik shu yilning 7-oktabr kuni boshlandi. Shu kuni ertalab HAMAS Isroilga qarshi “Al-Aqsa toʻfoni” deb nomlangan harbiy operatsiya boshladi va havodan zarbalar berdi. Minglab jangarilar yahudiylar davlati hududiga bostirib kirib, oʻnlab harbiy texnika va yuzdan ortiq insonni garovga oldi.

Shundan soʻng Isroil Bosh vaziri Binyamin Netanyaxu mamlakat urush holatida ekanligini eʼlon qildi. Mamlakat mudofaa kuchlarining javob operatsiyasi “Temir qilichlar” deb ataldi va uning maqsadi HAMASni yoʻq qilish hisoblanadi.