Oʻzbekiston Respublikasi Prezidentining 2021-yil 11-fevraldagi “Davlat aktivlarini xususiylashtirish jarayonlarini yanada jadallashtirish toʻgʻrisida”gi PF–6167-son (Oʻzbekiston Respublikasi Prezidentining 2021-yil 30-iyuldagi PF-6273-son Farmoni bilan kiritilgan qoʻshimchalar bilan), Oʻzbekiston Respublikasi Davlat aktivlarini boshqarish agentligi (keyingi oʻrinlarda – Davaktiv agentligi yoki Sotuvchi) “Hyatt Regency Tashkent” mehmonxonasini (keyingi oʻrinlarda – Mehmonxona yoki Aktiv) oshkora raqobat tamoyillariga asoslangan savdo jarayoni orqali sotilishini eʼlon qildi.

Bu haqda Davaktiv agentligi maʼlum qildi.

Ushbu Savdo jarayoniga “KPMG Valuation and Consulting” MCHJ (keyingi oʻrinlarda – KPMG), aktivni xususiylashtirish boʻyicha eng yaxshi takliflarni tanlash asosida, eksklyuziv moliyaviy maslahatchi sifatida jalb etilgan.

Mehmonxona haqida qisqacha maʼlumot:

— Besh yulduzli “Hyatt Regency Tashkent” mehmonxonasi 2016-yilda Toshkent markazida tashkil topgan va “Hyatt” xalqaro brendining Oʻzbekistondagi birinchi mehmonxonasiga aylangan;

— U Oʻzbekistonda xalqaro mehmonxonalar tarmogʻi boshqaruvida boʻlgan yagona besh yulduzli mehmonxonadir;

— Mehmonxona shahar markazida, Toshkentning asosiy diqqatga sazovor joylariga qulay va yaqin masofada joylashgan;

— Umumiy yer maydoni 3,1 gektar, bino va inshootlar maydoni 60,1 ming kvadrat metrni tashkil etadi;

— Mehmonxona 8 qavatdan iborat boʻlib, mijozlar uchun 300 ta xona, jumladan, 248 ta standart va 52 ta lyuks/yarim lyuks xonalarni mavjud;

— Mehmonxona hududida xalqaro sifat standartlari darajasida jihozlangan turli sigʻimdagi bir nechta konferensiya zallari, shuningdek, 850 kvadrat metr maydonga ega banket zali, yopiq basseyn va SPA markazi mavjud.