Gayana Oʻzbekiston bilan diplomatiya munosabatlari oʻrnatgan 142-davlat boʻldi
Foto: "Dunyo" AA
Gayana Oʻzbekiston diplomatiya munosabatlarini oʻrnatgan 142-davlat boʻldi.
10-oktyabr kuni Nyu-York shahrida (AQSH) Oʻzbekiston Respublikasi va Gayana Kooperativ Respublikasi oʻrtasida diplomatik munosabatlar oʻrnatish toʻgʻrisida Qoʻshma kommyunike imzolandi. Bu haqda “Dunyo” axborot agentligi xabar berdi.
Hujjatni ikki davlat hukumatlari nomidan Oʻzbekistonning BMTdagi doimiy vakili Baxtiyor Ibragimov va Gayananing BMTdagi doimiy vakili Karolin Rodrigez Birket imzoladi.
Gayana Janubiy Amerikaning shimoli-sharqiy sohilida joylashgan, Britaniya Hamdoʻstligi, shuningdek, Amerika davlatlari tashkilotiga aʼzo.
Tomonlar xalqaro tashkilotlar, jumladan, BMT va uning ixtisoslashgan muassasalari doirasida qoʻshma hamkorlikni mustahkamlashdan manfaatdor ekanligini tasdiqladi. Hamkorlikning oʻzaro manfaatli yoʻnalishlarini izlash uchun ikki tomonlama aloqalarni davom ettirish boʻyicha kelishuvga erishildi.
Hujjatning imzolanishi Oʻzbekistonning Janubiy Amerika davlatlari bilan oʻzaro hamkorligini kengaytirish yoʻlidagi muhim qadam boʻldi.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring