Foto: Fargʻona YHXB

Fargʻonada “Lacetti” avval “Spark” bilan toʻqnashib, keyin yoʻl chetida turgan fuqaroni urib yubordi. Bu haqda viloyat Yoʻl harakati xavfsizligi boshqarmasi xabar berdi.

Maʼlum qilinishicha, 16-oktyabr kuni soat 8:10 lar chamasida Yozyovon tumani hududidan oʻtuvchi A-373 “Toshkent–Oʻsh” avtomobil yoʻlining 282-kilometrida “Mustaqillik” va “Andijon” koʻchalari kesishgan chorrahasida sodir boʻlgan.

Mazkur chorrahada 1964-yilda tugʻilgan J.T. “Spark” rusumli avtomobilida orqaga qayrilmoqchi boʻlgan vaqtida, yoʻlning qarshi tomonidan oʻz yoʻnalishi boʻyicha harakatlanib kelayotgan “Lacetti” rusumli avtomashina bilan toʻqnashib ketgan.

Toʻqnashuv tufayli boshqaruvni yoʻqotgan “Lacetti” yoʻl chetida velosipedda turgan 1991-yilda tugʻilgan fuqaro T.A.ni urib yuborgan. Yoʻl-transport hodisasi oqibatida T.A. tan jarohati olib shifoxonaga yuborilgan.

Hozirda ushbu holat yuzasidan Yozyovon tumani IIB tergov boʻlimi tomonidan tergovga qadar tekshiruv harakatlari olib borilmoqda.

Eslatib oʻtamiz, avvalroq Fargʻona viloyati Margʻilon shahrida “Nexia-1” uch nafar maktab oʻquvchisini urib yuborgani xabar qilingan edi.