Eron sud hokimiyati rahbari Gʻolyam Husayn Mohseni-Ejeining bayonot berishicha, AQSH Pokistonning Islomobod shahrida boʻlib oʻtgan muzokaralarda harbiy harakatlar davomida qoʻlga kirita olmagan maqsadlariga erishishga harakat qilgan, biroq muvaffaqiyatsizlikka uchragan. Uning soʻzlaridan TASS iqtibos keltirmoqda.

“Amerikaliklar oʻzlariga xos manmanlik va kibr bilan hamda muzokaralarning eski formulasi — soxta talablarni majburlab oʻtkazish orqali Islomoboddagi uchrashuvga kelishdi. Ular 40 kunlik urushda erisha olmagan narsalarini toʻgʻridan-toʻgʻri muzokaralar stolida qoʻlga kiritishni xohlashdi. Biroq Qolibof boshchiligidagi Eron delegatsiyasi Eron xalqining qonuniy huquqlari va yutuqlarini donishmandlik bilan himoya qildi. Natijada, ochkoʻz va magʻrur amerikaliklar xuddi 40 kunlik urush maydonida boʻlgani kabi, muzokaralarda ham magʻlubiyatga uchradilar. Harbiylarimizning barmoqlari tepkida turibdi, vaqtinchalik oʻt ochishni toʻxtatish esa bu jangchilarning ruhiyatini zaiflashtirgani yoʻq”, — dedi u.

Eslatib oʻtamiz, 28-fevral kuni AQSH va Isroil Eronga qarshi harbiy operatsiya boshlagan edi.

Amerika yetakchisi Donald Tramp 7-aprel kuni Eron bilan ikki haftalik oʻzaro oʻt ochishni toʻxtatish kelishuvini eʼlon qilgandi.

Oʻtgan dam olish kunlari Eron va AQSH Pokiston poytaxtida bir necha bosqichli muzokaralar oʻtkazdi. Bir qator ziddiyatlar tufayli tomonlar nizoni uzoq muddatli hal etish masalasida kelishuvga erisha olmadilar.