Oʻzbekistonda 2025-yilning yanvar–aprel oylarida yengil avtomobillar ishlab chiqarish sohasida yuqori oʻsish kuzatildi. Milliy statistika qoʻmitasining dastlabki maʼlumotlariga koʻra, ushbu toʻrt oyda mamlakatda jami 122 ming 384 dona har xil turdagi yengil avtomobillar (maxsus yengil avtomobillardan tashqari) ishlab chiqarilgan. Bu koʻrsatkich mahalliy avtosanoatning barqaror rivojlanayotganidan dalolat beradi.

Ishlab chiqarilgan avtomobillar orasida “Cobalt” rusumi eng yuqori koʻrsatkichni qayd etdi. Toʻrt oyda 44 ming 747 dona “Cobalt” avtomobili konveyerdan chiqdi. Bu umumiy ishlab chiqarilgan mashinalarning qariyb uchdan bir qismini tashkil etadi.

Undan keyingi oʻrinda “Damas” rusumi turibdi — 29 ming 955 dona. Bu ham anʼanaviy ravishda talab yuqori boʻlgan modellardan biri hisoblanadi.

Shuningdek, “Onix” — 15 ming 236 dona, “Tracker” — 14 ming 92 dona avtomobil ishlab chiqarilgan. “Kia” brendidan 8 ming 680 dona, BYDdan 4 ming 267 dona, “Chery”dan 2 ming 773 dona va “Haval”dan 2 ming 634 dona avtomobil ishlab chiqarilgani qayd etilgan. Bu mahalliy avtosanoatda turli brendlar va modellar oʻrtasida raqobat kuchayib borayotganini koʻrsatadi.

Bundan tashqari, ushbu davrda 12 ming 983 dona maxsus yengil avtomobillar ham ishlab chiqarilgan.