Mazkur yangi tartibni belgilash toʻgʻrisidagi hujjat Adliya vazirligida davlat roʻyxatidan oʻtkazildi.

Adliya vazirligi tomonidan оliy va oʻrta maxsus taʼlim vazirining Oʻzbekiston Respublikasi oliy taʼlim muassasalari bitiruvchilarining yakuniy davlat attestatsiyasi toʻgʻrisidagi nizomga oʻzgartirishlar kiritishni nazarda tutuvchi buyrugʻi davlat roʻyxatidan oʻtkazildi (roʻyxat raqami 1963-3, 2021-yil 16-noyabr).

Unga koʻra, yakuniy davlat attestatsiya sinovidan oʻta olmagan shaxs keyingi har bir oʻquv yilida (3 yil davomida) oʻz arizasiga muvofiq 2-martagacha imtihonni qayta topshirish huquqiga ega.

Oldingi tartib boʻyicha bitiruvchi yakuniy davlat attestatsiyasi sinovidan oʻta olmagan taqdirda keyingi yillarda qayta topshirish huquqiga ega edi. Ushbu holat talaba uchun birmuncha qiyinchiliklar, xususan uning bir yillik qimmatli vaqtini maqsadli sarflay olmasligiga sabab boʻlib kelgan.

Endilikda talabalar tomonidan qayta topshirish toʻgʻrisidagi arizalar yigʻilishiga qarab bir oʻquv yilda ikki martagacha davlat imtihonlarini qayta topshirish imkoniyati yaratildi.