Foto: AP

Amerika Qoʻshma Shtatlari Falastin — Isroil mojarosi tugash vaqtini bashorat qilish majburiyatini olmaydi, ammo vaziyat oʻzgarishiga ishonadi.

Bu haqda AQSH prezidentining milliy xavfsizlik boʻyicha maslahatchisi oʻrinbosari Jon Fayner “CBS News” telekanaliga bergan intervyusida maʼlum qildi.

“Men mojaro tugashiga qanchalik yaqinmiz yoki yoʻqligimiz haqida taxmin qilishni xohlamayman”, dedi Oq uy rasmiysi. Faynerning soʻzlariga koʻra, qachonki qurolli qarama-qarshilik tugasa, hamma narsa avvalgidek boʻlmaydi.

“Biz Gʻazo sektori va Gʻarbiy Sohilni oʻz ichiga olgan ikki davlat yechimini topish boʻyicha shoshilinch ishga qaytishimiz kerak”, deya xulosa qildi u.

Gʻazo sektoridagi qarama-qarshilik shu yilning 7-oktyabr kuni boshlandi. Shu kuni ertalab HAMAS Isroilga qarshi “Al-Aqsa toʻfoni” deb nomlangan harbiy operatsiya boshladi va havodan zarbalar berdi. Minglab jangarilar yahudiylar davlati hududiga bostirib kirib, oʻnlab harbiy texnika va yuzdan ortiq insonni garovga oldi.

Shundan soʻng Isroil Bosh vaziri Binyamin Netanyaxu mamlakat urush holatida ekanligini eʼlon qildi. Mamlakat mudofaa kuchlarining javob operatsiyasi “Temir qilichlar” deb ataldi va uning maqsadlaridan biri HAMASni yoʻq qilish hisoblanadi.

2023-yil 28-oktyabrda Isroil Gʻazoda quruqlikdagi operatsiyani boshladi. Yaqin Sharqda navbatdagi eskalatsiya boshlanganidan beri Gʻazo sektorida halok boʻlganlarning umumiy soni 9227 nafarga yetdi.

Oldinroq, HAMAS AQSH va shaxsan prezident Jo Baydenni Gʻazo sektoridagi ommaviy qotilliklarda ayblagandi.

Oʻz navbatida, AQSH Davlat kotibi Gʻazoda oʻt ochishni toʻxtatish Falastinning HAMAS radikal harakati kuchlarining qayta toʻplanishiga olib kelishini aytdi.