«Alkogol va tamaki mahsulotlarini aksiz markalari bilan markirovkalash boʻyicha qoʻshimcha chora-tadbirlar toʻgʻrisida»gi Hukumat qarori (665-son, 02.11.2021-y.) qabul qilindi.

Qarorga koʻra, 2021-yil 1-dekabrdan 2022-yil 1-noyabrgacha, sinov tariqasida, koʻpiklanadigan va tabiiy vino mahsulotlari aksiz markalari bilan markalanmaydi.

2022-yil 1-sentabrgacha yoki 2022-yil 1-sentabrdan keyin boshqa turdagi tamaki mahsulotlari (filtrli va filtrsiz sigaretalardan boshqa turdagi chekiladigan tamaki mahsulotlari, chekilmaydigan tamaki mahsulotlari, nikotinli tamakisiz snyuslar, tarkibida nikotin mavjud suyuqliklar va nikotinli elektron sigaretalar) ishlab chiqaruvchilar va import qiluvchilar mazkur faoliyat amalga oshirilishi zarurati yuzaga kelgan kundan boshlab 7 kun mobaynida markirovkalash axborot tizimida roʻyxatdan oʻtadi.

2022-yil 1-oktabrdan isteʼmol va guruhlangan qadoqlarga raqamli identifikatsiyalash vositalari tushiriladi, shuningdek, boshqa turdagi tamaki mahsulotlarini agregatsiyalash taʼminlanadi.

2023-yil 1-martdan boshqa turdagi tamaki mahsulotlari aylanmasi boʻyicha barcha harakatlar toʻgʻrisidagi maʼlumotlar markirovkalash axborot tizimiga kiritiladi.

2022-yil 1-oktabrdan Oʻzbekistonda raqamli identifikatsiyalash vositalarini tushirmasdan hamda raqamli identifikatsiyalash vositalari bilan markirovkalash toʻgʻrisidagi maʼlumotlarni markirovkalash axborot tizimiga yubormasdan ishlab chiqarish taqiqlanadi.

2022-yil 1-oktabrdan keyin ishlab chiqarilganda (olib kirilganda) ularning chakana savdosiga faqat markirovkalash axborot tizimiga maʼlumotlarni kiritish sharti bilan ruxsat etiladi.

2022-yil 1-oktabrgacha ishlab chiqarilganda (olib kirilganda) ularning chakana savdosiga 2023-yil 1-oktabrgacha ruxsat etiladi.