Illyustrativ foto

“Oʻzgidromet” agentligi jahon prognozlash markazlarining dastlabki hisob-kitoblari tayanib, 2024-yilning bahor faslini birinchi oyida kutilayotgan ob-havo haqida maʼlumot berdi.

Mart oyida Oʻzbekistonda havo harorati odatda tez koʻtarila boshlaydi. Mart oyida oʻrtacha havo harorati fevralga nisbatan 5-6° ga, shimolda esa 7-8° ga yuqori boʻladi.

Mart oyining eng iliq kunlarida, ayniqsa oyning ikkinchi yarmida quyosh nurlari havoni 23-28° iliqqacha, janubda esa 30-33° iliqqacha isitadi.

Meteorologik kuzatuvlarning barcha yillari uchun mart oyida qayd etilgan eng yuqori harorat qiymatlari hududning katta qismida 30-33° iliqni, janubiy hududlarda esa 34-37° iliqni tashkil etadi.

Biroq, mart juda murakkab oy deb hisoblanadi. Ushbu oy havo oqimlari yoʻnalishi tez-tez oʻzgarishi bilan tavsiflanadi. Janubdan juda iliq havoni jadallik bilan kirib kelishi Volga boʻyi, Ural va Gʻarbiy Sibir hududlaridan sovuq havo oqimi kirib kelishi bilan almashadi.

Iliq ob-havo davrlari sovuq davrlar bilan almashadi, bunda harorat koʻpincha 0-5° sovuqqacha pasayadi.

Oʻzbekistonda meteorologik kuzatuvlarning barcha yillari uchun mart oyida mutlaq minimal harorat hududning katta qismida 15-20o sovuqni, Qoraqalpogʻiston Respublikasi va Qizilqum shimolida 23-25° sovuqqachani tashkil etadi. Ustyurtda esa 1954-yil mart oyida harorat 34-37° sovuqqacha pasaygan.

Soʻnggi oʻttiz yil ichida mart oyida bunday past harorat kuzatilmadi. Soʻnggi 30-yilda mart oyining eng past harorati hududning katta qismida 6-11° sovuqni, shimolda 11-16° sovuqni, Ustyurtda 20-23° sovuqni tashkil etdi.

Kutilayotgan bashoratga koʻra, mart oyida oʻrtacha oylik havo harorati meʼyordan 1-2° ga past, baʼzi joylarda meʼyor atrofida boʻlib, 4-9° iliqni, janubda 10-11° iliqni tashkil etadi.

Oy davomida harorat kechalari 0-5° sovuqdan 5-10° iliqqacha, kunduz kunlari 5-10° iliqdan 17-22° iliqqacha, janubda 20-25° iliqqacha keskin oʻzgarib turishi prognoz qilinmoqda.

Respublika hududining katta qismida oylik yogʻingarchilik miqdori meʼyor atrofida, baʼzi joylarda undan koʻp boʻlishi kutilmoqda.