Иллюстратив фото

Кеча Ахборот ва оммавий коммуникациялар агентлигида тест синовлари натижалари бўйича брифинг бўлиб ўтди.

“6 август куни тес тсиновлари республика бўйлаб 66 та бинода икки сменада, бир вақтда бошланиб, белгиланган вақтда якунланган, — деди Давлат тест маркази Бош бошқарма бошлиғи Диёрбек Қўчқоров. — Жами 71 340 нафар иштирок этиши белгиланган абитуриентлардан тест синовларига 69 минг 633 нафари келган. 1645 нафар абитуриент эса номаълум сабабларга кўра иштирок этмади. Шу ўринда таъкидлаб ўтиш жоиз, аксарият абитуриентлар олий ўқув юртларига ҳужжат топширганлар сонини сунъий ошириш мақсадида ҳам рўйхатдан ўтишган. Чунки, уларнинг жуда кўпчилиги, ҳатто, рўйхатга олингандан сўнг ДТМ томонидан улар учун очилган шахсий электрон манзилларига бир марта ҳам киришмаган. ДТМ рухсатномасини олишга ҳам келишмаган. Марказимиз томонидан ҳозирда бу ҳолатларнинг сабаби ўрганилмоқда. Ва кейинги йилги тест синовларида бундай тушунарсиз "эътиборсизлик"нинг олдини олиш у ҳам муайян чоралар кўришга ҳаракат қиламиз”.

Имтиҳоннинг навбатдаги куни абитуриентларнинг 33 нафари бинога киришда, 29 нафари эса бино ичида қоидани бузганликлари учун тест синовларидан четлатилган.

“Биз абитуриентларга ҳар қандай қоидага хилоф усуллардан фойдаланиш фойдасиз эканлигини тушунтирсак-да, барибир турли йўл билан шпаргалкалар олиб киришга уринишлар кузатиляпти, — деди Диёрбек Қўчқоров. — Масалан, бугун бино ичига микрочип олиб кирган абитуриент аниқланиб имтиҳондан чиқариб юборилди”.

Таъкидланишича, тест натижаларидан тўпланган баллар эртаси куни абитуриент шахсий электрон манзилига юборилади.

"Тест синовларидан жуда кам балл йиққан абитуриентларнинг ота-оналари бизга фарзандларининг бундан қаттиқ тушкунликка тушгани ва ўзига зарар етказишга ҳаракат қилгани ҳақида шикоятлар қилишмоқда, — деди Диёрбек Қўчқоров. — Мен бу ота-оналарга мурожаат қилмоқчиман: Сиз фарзандингизни назорат қилинг, шундай руҳий тушкун ҳолга тушиб қолгунга қадар ва тушкунликнинг одлини олиш учун эътиборли бўлинг. Олий ўқув юртига кириш истаги юқори бўлган ва фанлардан яхши тайёрланган абитуриент ҳеч қачон паст балл тўпламайди. Бу балл — болангизнинг бор реал билим даражаси. Тест синовларига тайёргарлик жараёнида эътиборли бўлиш — кейинги пушаймонларнинг олдини олади”.