Фото: AP

Австралия бош вазири Энтони Албаниз НАТО саммитида иштирок этиш учун Вашингтонга бормасликка қарор қилди. Бу ҳақда «Sydney Morning Herald» газетаси хабар бермоқда.

Албаниз 9 июль куни бошланадиган НАТОнинг 75 йиллик юбилей саммитида «Ҳинд-Тинч океани тўртлиги» аъзолари сифатида Япония, Жанубий Корея ва Янги Зеландиядаги ҳамкасблари билан учрашиши кутилган эди. Бироқ тадбирдан бир ҳафта олдин унинг ўрнига мудофаа вазири Ричард Марлес тадбирда қатнашиши маълум қилинди.

Марлеснинг идораси берган баёнотга кўра, унинг НАТО саммитида иштироки Австралиянинг минтақанинг стратегик устуворликларини қўллаб-қувватлаш ва қоидаларга асосланган глобал тартибни сақлаш, шу билан бирга мамлакатнинг хавфсизлик, иқтисодий ва савдо кун тартибини илгари суришга содиқлигини ифодалаши қайд этилган.

Австралия ҳукуматидаги манбанинг газетага айтишича, Энтони Албаниз саммит олдидан АҚШ президенти Жо Байден билан икки томонлама учрашувни тасдиқлай олмаганидан кейин шундай қарор қабул қилинган. Айни шу сабаб Албаниз идораси бош вазирга саммитда қатнашмасликни маслаҳат берган.

Бу Австралия бош вазирининг НАТО саммитига бошқа вазирни юбориши билан боғлиқ биринчи ҳолат эмас. Мамлакатнинг аввалги бош вазири Малкольм Тернбулл ўша пайтдаги мудофаа вазири Марисе Пейнни 2018 йилда Бельгияда ўтказилган НАТО саммитига юборганди.

Австралия НАТО ҳамкори мақомига эга. Бу йилги саммитда иштирок этиш таклифини альянснинг ўз лавозимини тарк этаётган бош котиби Йенс Столтенбергдан олганди.

Албанизнинг 2022 йилда Мадрид ва 2023 йилда Вильнюсда бўлиб ўтган НАТО саммитларида иштирок этиши Пекин, шунингдек, собиқ бош вазир Пол Китинг ва собиқ ташқи ишлар вазири Боб Карр томонидан кескин танқидларга сабаб бўлган эди. Улар АҚШ ва Европа давлатлари Ҳинд-Тинч океани минтақасидаги давлатларнинг муаммоларига аралашмаслиги керак, деган фикрни илгари сурганди.