Голливуд ва бутун дунёдаги мухлислар Чак Норрис — актёр, яккакурашлар устаси ва экшн-кино даври рамзи билан хайрлашмоқда. Унинг вафоти ҳақида пайшанба куни эрталаб маълум бўлди.

TMZ нашри берган маълумотга кўра, Чак Норрис Гавайи оролларида вафот этган. Актёрнинг оиласи ушбу қайғули хабарни тасдиқлаб, у яқинлари даврасида ҳаётдан кўз юмганини қайд этди.

«Оиламиз оғир жудолик билан севимли Чак Норрисимиз кеча эрталаб тўсатдан вафот этганини маълум қилади. Биз вафот этиш ҳолатларини сир сақлашни истардик, аммо шуни билингки, у оиласи даврасида бўлган ва тинч ҳолатда оламдан ўтган», — дейилади баёнотда.

Инстаграмда эълон қилинган хабарда шунингдек: «У ўз ҳаётини имон, мазмун ва ўзи севган инсонларига бўлган чексиз садоқат билан яшаб ўтди», — деб таъкидланади.

TMZ хабарига кўра, ўлимидан сал аввал актёр касалхонага ётқизилган — бу воқеа чоршанба ёки пайшанба куни содир бўлган. Вазият тез ривожланган: манбанинг сўзларига кўра, ҳали чоршанба куни Норрис машғулот ўтаётган ва яхши кайфиятда бўлган.

Чак Норрис 1980-йиллардаги «Дельта отряди» ва «Бедарак йўқолганлар» каби жангари фильмларидаги роллари орқали дунёга машҳур бўлган эди. 1990-йилларда эса машҳур «Уокер — техаслик рейнджер» сериалидаги Корделл Уокер роли билан ўз мавқеини мустаҳкамлаган.

Унинг исми нафақат куч ва харизма рамзига, балки кинодан тортиб интернет-мемларгача бўлган поп-маданиятнинг бир қисмига айланди. Чак Норрис ўзидан кейин бутун дунёдаги мухлислари қалбида яшайдиган катта мерос қолдирди.