Тошкент вилояти ҳокимининг 2024 йил 14 мартдаги қарорига кўра, Янги Тошкент шаҳрининг қурилиши учун яна 122,3 гектар ер майдони ажратилди. Ушбу қарор Ўзбекистон Республикаси Президентининг 2023 йил 20 июлдаги «Янги Тошкент шаҳрини барпо этиш чора-тадбирлари тўғрисида»ги 232-сонли қарори ҳамда Вазирлар Маҳкамасининг 2023 йил 30 октябрда қабул қилинган 568-сонли қарорига мувофиқ қабул қилинган.

Вилоят ҳокимлигининг қарорида кўрсатилишича, Юқори Чирчиқ туманининг «Бордонкўл» ҳудудидан 75,22 гектар, «Дўстлик» ҳудудидан эса 47,1 гектар ер майдони «Янги Тошкент шаҳрини барпо этиш дирекцияси»га доимий фойдаланиш ҳуқуқи билан берилган. Ушбу ер майдонлари илгари давлат захирасига қайтарилган ва тоифаси ўзгартирилган ҳудудлар сирасига киради.

Бундан аввал ҳам 2024 йил октябрь ойида 110,4 гектар ер Янги Тошкент қурилиши учун ажратилган эди. Шунингдек, Юқори Чирчиқ туманининг «Ўзбекистон», «Гулистон» ва «Истиқлол» маҳаллалари Янги Тошкент шаҳри ҳудудига ўтказилган. Вилоят ҳокимлиги матбуот хизматининг маълумотларига кўра, бугунги кунга қадар жами 2 200 гектардан ортиқ ер Янги Тошкент лойиҳаси доирасида берилган.

Қарорда, шунингдек, ер ҳужжатларини расмийлаштириш ва давлат реестридан ўтказиш вазифаси Давлат кадастрлари палатаси вилоят бошқармасига юклатилган. Шаҳар қурилиши бўйича назорат ишлари ҳоким ўринбосари зиммасига юклатилгани ҳам ҳужжатда кўрсатиб ўтилган.

Қайд этиш керакки, 2023 йил март ойида Янги Тошкент шаҳрининг қурилишига тамал тоши қўйилган эди. Қурилиш жараёнлари босқичма-босқич амалга оширилади ва инфратузилма объектлари, турар жой массивлари, маъмурий бинолар ҳамда ижтимоий хизматлар марказлари барпо этилиши кўзда тутилган.

Янги Тошкент лойиҳаси Ўзбекистоннинг янги урбанизация маркази бўлиши ва пойтахтдаги юкламани камайтириш мақсадида амалга оширилмоқда. Мазкур мегапроект доирасида замонавий транспорт тармоқлари, экологик хавфсизлик чораларини таъминловчи иншоотлар ва аҳоли учун қулай яшаш муҳитини яратиш режалаштирилган.