Зайнобиддин ота Қодиров уруш қатнашчиси. У илк бор 1942 йили Сталинград остонасидаги жангларда иштирок этган. Шундан сўнг Европани фашизмдан халос этишда қатнашди. Ғалабани Берлинда нишонлаган.

— Бугунги ҳолат ҳам урушдек гап, — дейди Зайнобиддин ота. — Яхшиямки, қурбонлар кам. Бу йилги Ғалаба кунини уйда карантин қоидаларига амал қилган ҳолда қарши олаётганимдан хафа эмасман. Муҳими, юртимиздла тинчлик бўлсин!

Жалақудуқ туманининг Қўшчинор маҳалласида истиқомат қилувчи отахон 95 ёшда. 7 фарзанд, 37 набира, 20 чевара ва 1 бир нафар эваралар ардоғида яшамоқда. Отахоннинг уруш ҳақидаги ҳикояларини тинглар экансиз, инсон ҳаётидаги энг бахтиёр онлар тинчликда, хотиржамликда ўтган дақиқалар эканлигига ишонч ҳосил қиласиз.

Шу ўринда айтиш жоизки, иккинчи жаҳон урушига Андижон вилоятидан 97,5 минг киши сафарбар этилган бўлиб, улардан 54 минг нафари уйига қайтган. Уларнинг ҳам 40,9 минги ногирон эканлигини ҳисобга олсак, уруш инсоният бошига не кечмишларни солганлигига амин бўламиз.

Саминжон ҲУСАНОВ,

“Халқ сўзи”

Азаматжон ТОШМАТОВ олган сурат.