Истанбулнинг Коғитхона туманида яшовчи таниқли модель ва ижтимоий тармоқлар юлдузи Айшегул Эрасланнинг жасади ўз хонадонидан топилди. Қиз билан боғлана олмаган яқинлари полицияга хабар берган ва уйга кирилганда унинг ҳаётдан кўз юмгани аниқланган.

Воқеа жойидан қон излари бўлган қўлёзма хат топилган. Унда модель: «Мен жуда яхши инсон эдим. Ҳеч кимга ёмонлик қилмадим. Баъзи нарсаларни енга олмаяпман... Итларимга яхши қаранг. Отамдан узр сўрайман, бу ҳаётда на она, на ота меҳрини кўрдим, фақат зўравонлик ичида ўсдим», — деб ёзган.

Бироқ моделнинг яқин дўсти Семих Паланжи ушбу версияга шубҳа билдирмоқда. Паланжининг таъкидлашича, хатдаги ёзув Айшегулнинг дастхатига мутлақо ўхшамайди. Марҳуманинг бўйнида бўғилиш ва билакларида кесилиш излари борлиги айтилмоқда. Тергов давомида модель ўлимидан бир соат олдин унинг уйига «Yeraltı» сериали актёри Сунай Куртулуш келиб кетгани аниқланган. Актёр аллақачон кўрсатма берган ва ўзининг бу воқеага алоқаси йўқлигини таъкидлаган.

Айшегул Эраслан Туркиянинг энг машҳур мода лойиҳаларидан бири — «İşte Benim Stilim» шоусидаги иштироки билан танилган эди. У нафақат модель, балки иқтидорли мода дизайнери ва блогер сифатида ҳам катта аудиторияга эга эди.

Ҳозирда Истанбул полицияси ва прокуратураси воқеа юзасидан кенг қамровли тергов олиб бормоқда. Бу ўз-ўзини ўлдиришми ёки пухта режалаштирилган қотиллик — суд-тиббий экспертизаси хулосаларидан сўнг маълум бўлади.