Фото: Reuters

Туркия президенти Режеп Таййип Эрдоған унинг мамлакати Россия ва Украина ўртасидаги музокаралар учун платформага айланишга тайёрлигини билдирди.

Туркия етакчиси шундай таклиф билан Украина — Жануби-Шарқий Европа саммити иштирокчиларига йўллаган видеомурожаатида маълум қилди.

Эрдоған Туркия Украина президенти Владимир Зеленский таклиф қилган тинчлик режасини “асосан қўллаб-қувватлашини” айтди. Бироқ, Туркия раҳбарининг сўзларига кўра, Украинадаги тинчлик ташаббуслари муваффақиятининг зарурий шарти ҳар икки томоннинг, яъни Киев ва Москванинг иштирокидир.

Аввалроқ, икки томон ўртасида музокаралар Истанбулда бўлиб ўтган эди.

“Мен дипломатия ва мулоқотга адолатли ва мустаҳкам тинчликка эришиш орқали урушни тугатиш имкониятини бериш керак, деган фикрдаман. Ҳеч бўлмаганда тинчликнинг умумий параметрларини аниқлаш учун биргаликдаги саъй-ҳаракатларни бошлаш зарур, деб ҳисоблайман”, — дейди Эрдоған.

Олдинроқ, Ядро қуролларини бекор қилиш бўйича халқаро кампаниянинг (ICAN) сиёсат ва тадқиқот координатори Алисия Сандерс-Закре Украинадаги можаро қасддан ёки беихтиёр ядровий урушга айланиб кетиши мумкинлигини айтганди.