Фото: AP

АҚШ президенти Дональд Трамп маъмурияти Конгресс томонидан тасдиқланган хорижий ёрдам пакетини бекор қилмоқчи, деб ёзмоқда «The New York Post».

«Президент Трамп Конгресс томонидан тасдиқланган қарийб 5 миллиард долларлик хорижий ёрдам ва тинчликни сақлаш операциясини бекор қилмоқчи», — дейилади нашрда.

Манбага кўра, Оқ уй 48 йил давомида қўлланилмаган қонунчилик найрангидан фойдаланишни режалаштирмоқда. У давлат раҳбарининг Конгрессга молиявий йил охиригача иложи борича харажатларни бекор қилиш тўғрисида сўров юборишидан иборат. Натижада, ушбу маблағлардан фойдаланиш муддати қонун чиқарувчи орган сўровга жавоб бергунга қадар тугайди.

Қайд этилишича, мазкур беш миллиардга АҚШ Халқаро тараққиёт агентлиги (USAID) орқали ёрдам кўрсатиш харажатлари, шунингдек, тинчликпарварлик фаолиятига сарфланган маблағлар ва халқаро ташкилотларга бадаллар киради.

Февраль ойи бошида америкалик тадбиркор, кейинчалик Ҳукумат самарадорлиги департаменти раҳбари Илон Маск Трамп USAIDни ёпишга рози бўлганини эълон қилди. Миллиардер агентликни «ўлиши керак бўлган жиноий ташкилот» ва «Америкадан нафратланган радикал чап қанот марксистларнинг илон уяси» деб атади. Трампнинг ўзи ҳам агентликни америкалик солиқ тўловчилар маблағларини АҚШ манфаатларига хизмат қилмайдиган лойиҳаларга беҳуда сарфлашда, шунингдек, оммавий ахборот воситаларига тўлаш учун давлат бюджетидан миллиардлаб доллар ўғирлашда айблаб, бир неча бор танқид қилган. У лавозимга киришгандан сўнг дарҳол хорижий ёрдамни кўриб чиқиш жараёнини бошлади. Оқ уй USAIDни Давлат департаменти билан бирлаштирмоқчи экани хабар қилинганди. Шу билан бирга, ОАВ хабарларига кўра, агентлик инсонпарварлик ёрдами учун масъул тузилма сифатида фаолиятини давом эттиради.