Тошкентда ўзганинг номига кредит олиб, пулларни ўзлаштирган шахс ушланди
Иллюстратив фото
Тошкент шаҳрида ўзганинг номига 18 млн сўм кредит олиб, пулларни ўзлаштирган шахс ушланди. Бу ҳақда Киберхавфсизлик маркази хабар берди.
Қайд этилишича, пойтахтда яшовчи 36 ёшли О.С. ички ишлар органига ариза билан мурожаат қилиб, номаълум сабабларга кўра унинг номига 18 млн сўм онлайн кредит расмийлаштирилганлигини ва айбдор шахсга қонуний чора кўришни сўраган.
Тезкор-қидирув хизмати Киберхавфсизлик бўлими ходимлари томонидан ўтказилган тезкор-қидирув тадбирлари натижасида, мазкур жиноятни Тошкент шаҳрида яшовчи М.А. содир этгани аниқланган.
Маълум бўлишича, гумонланувчи М.А. жабрланувчи О.С.га сохта ҳавола юбориш орқали шахсий маълумотларини қўлга киритиб, унинг банк мобил иловасига иккинчи фойдаланувчи сифатида уланиб олган. Шундан сўнг унинг номидан 18 млн сўм онлайн кредит расмийлаштириб, ўша вақтнинг ўзида мазкур пулларни ўзининг фойдаланувида бўлган банк пластик картасига ўтказиб олган.
Манбага кўра, ҳозирда мазкур ҳолат юзасидан М.А.га нисбатан Жиноят кодексининг 169-моддаси (ўғрилик) 3-қисми «б» банди билан жиноят иши қўзғатилган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг