Тошкентда ҳайдовчиси ухлаб қолган «Lacetti» 3 та машина билан тўқнашди
Видеодан кадр
Тошкент шаҳри Юнусобод туманида «Lacetti» русумли машинани бошқариб кетаётган фуқаро ҳаракат вақтида ухлаб қолиши оқибатида ЙТҲ содир бўлди. Бу ҳақда пойтахт ИИББ ЙҲХБ ахборот хизмати хабар берди.
Қайд этилишича, бугун, 19 февраль куни соат 09:15 ларда Яшнобод тумани, Маҳтумқули кўчасида «Lacetti», «Malibu», «Cobalt», «Lada», русумли транспорт воситалари иштирокида йўл-транспорт ҳодисаси содир бўлган.
Ижтимоий тармоқларда тарқалган видеодан кўринадики, «Lacetti» йўлда зич ва секин ҳаракатланаётган оқим давомида тезлик билан «Lada» ва «Cobalt» машиналари орасидан ўтиб, уларга шикаст етказган. Шундан сўнгра у «Malibu»га бориб урилган.
Манбага кўра, ЙТҲга «Lacetti» ҳайдовчисининг рулда ухлаб қолиши сабаб бўлган. Ҳодиса оқибатида жабрланганлар йўқ, ҳозирда ҳолат юзасидан тергов бошланган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг