Тошкентда эркаклар гиёҳвандлик воситалари сотиладиган интернет-дўконлар учун флаер тарқатиш билан шуғулланган, деб хабар қилди Марказий ИИБ матбуот хизмати.

Миробод тумани ИИБ ходимлари томонидан наркотик моддалар тарқалишининг олдини олишга қаратилган профилактика тадбирлари давомида флаерлар сотаётган вақтда жиноят содир этган 26 ёшли фуқаро ушланди. Ашёвий далил сифатида ундан гиёҳванд моддалар сотувчи интернет-дўконларни реклама қилувчи 1093 дона флаерлар олиб қўйилди.

Суҳбат давомида қўлга олинган шахс Телеграм мессенжери орқали варақалар тарқатиб пул ишлашни таклиф қилган номаълум шахс билан боғланганини айтди. 29 октябрь куни у қўлга олинган шахсга 1750-1800 га яқин варақаларни топшириб, уларнинг бир қисмини Яшнобод ва Миробод туманларига тарқатган.

Кейинроқ, терговга қадар ўтказилган текшириш чоғида номаълум шахс ушланиб, у 2003 йилда туғилган йигит бўлиб чиқди. У шу йилнинг сентябрь ойида махсус веб-сайт орқали варақалар тарқатиш кўринишида «иш» топганини айтди. Уларни Мирзо Улуғбек туманидаги босмахонада тайёр ҳолда қабул қилди. Кўп ўтмай, босмахонанинг икки ишчиси ҳам қўлга олинди. Улардан 6 минг дона тайёр флаер ашёвий далил сифатида олинди.

Мазкур ҳолат юзасидан тегишли ҳужжатлар тўпланиб, қонуний чора кўриш учун Миробод вилояти ИИБга топширилди.