Тоқаев «Спутник-V» вакцинаси билан эмланди
«Казинформ» агентлигининг Қозоғистон президенти матбуот котиби Берик Уалининг ижтимоий тармоқдаги расмий саҳифасига таяниб хабар беришича, Қозоғистон президенти Қосим-Жомарт Тоқаев Қарағанда фармацевтика заводида ишлаб чиқарилган «Спутник-V» вакцинаси билан эмланган.
Айни пайтда давлат раҳбарининг аҳволи яхши, вакцинанинг ҳеч қандай салбий таъсири кузатилмаган.
Президентнинг таъкидлашича, Қозоғистон фуқароларининг эмланиши ва жамоавий иммунитет шаклланиши коронавирусни енгиш, барча чекловларни бекор қилиш, одамларнинг кундалик ҳаётига қайтиши, иқтисодиётни тиклаш имконини беради. Давлат раҳбари фуқароларни яна бир бор имкон қадар тезроқ вакцина қабул қилишга чақирган. Бу ўзи ва яқин кишиларини эҳтиёт қилишнинг ягона йўлидир, дейди давлат раҳбари.
«Бундан аввалроқ Қозоғистон президенти ҳукуматга ҳамда маҳаллий ижро органларига хориждан вакцина келтириш ҳамда маҳаллий шароитда ҳам ишлаб чиқаришни йўлга қўйиш, шунингдек эмлаш тадбирларини ташкил этишни таъминлаш вазифасини қўйганди», – дейди Берик Уали.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг