Кеча, 18 март куни, АҚШ президенти Дональд Трамп ва Россия президенти Владимир Путин телефон орқали мулоқот қилди. Оқ уй мазкур мулоқот якунлари бўйича баёнот берди. Бу ҳақида «РБК» нашри маълум қилди.

Унга кўра, мулоқот давомида Трамп ҳамда Путин Украинадаги урушни тўхтатиш ва тинчликка эришиш масалалари юзасидан муҳокама ўтказган. Иккала давлат раҳбари ҳам ушбу можаро тезроқ ҳал қилиниши тарафдори эканини таъкидлаган.

Путин Трампнинг 30 кун муддатга энергетика соҳаларига зарба беришни тўхтатиш таклифини қўллаб-қувватлаган ҳамда дарҳол рус ҳарбийларига тегишли буйруқни берган.

«Раҳбарлар энергетика ва инфратузилманинг барча соҳаларида зудлик билан ўт очишни тўхтатишга келишиб олди. Тўлиқ ўт очишни тўхтатиш ва доимий тинчликни амалга ошириш бўйича музокаралар давом этади», — дейилади Оқ уй баёнотида.

Суҳбат давомида Трамп ва Путин АҚШ ҳамда Россия ўртасидаги муносабатларни яхшилаш зарурлигига ҳам алоҳида тўхталиб ўтди. Урушга сарфланаётган кенг миқёсдаги ресурслар икки давлат халқларининг манфаатлари ва фаровонлигига йўналтирилса мақсадга мувофиқ бўлиши таъкидланган.

Шунингдек, суҳбат чоғида президентлар Яқин Шарқдаги можароларнинг олдини олиш бўйича ҳамкорлик қилиш имкониятларини ҳам муҳокама қилишган. Улар стратегик қуролларнинг тарқалишига йўл қўймаслик бўйича биргаликда ишлашга келишиб, бу йўналишда бошқа давлатлар ёрдамида ҳаракат қилишни режалаштирмоқда.

Путин Россия-Украина можароси янада авж олмаслиги учун Украинага қурол етказиб беришни тўхтатиш кераклигини айтган.

Аввалроқ, АҚШ Украина етакчиси Владимир Зеленский ва Трамп ўртасидаги келишмовчиликдан сўнг Киевга ёрдамни тўхтатган эди. Сўнгра Киев Украина-АҚШ музокараларида таклиф қилинган 30 кунлик сулҳга рози бўлгач, Украинига ёрдам етказиш қайта тикланган.