Жорий йил 16 сентябрда “Судга мурожаат қилиш учун янада қулай шароитлар яратилиши ва фуқаролик процессига соддалаштирилган иш юритиш тартиби жорий этилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун қабул қилинган эди.

Жорий йилнинг 17 сентябрь кунидан бошлаб кучга кирган мазкур Қонун билан суд ҳужжати устидан шикоят қилиш жараёнидаги айрим бюрократик тўсиқларни бартараф этиш мақсадида Жиноят-процессуал, Фуқаролик процессуал, Иқтисодий процессуал кодекслар, Маъмурий жавобгарлик тўғрисидаги ва Маъмурий суд ишларини юритиш тўғрисидаги кодексларга ўзгартиришлар киритилди.

Хусусан, баҳоси катта бўлмаган даъволарни судья томонидан якка тартибда, суд муҳокамасини ўтказмасдан, тарафларни чақирмасдан, улар томонидан такдим этилган ҳужжатларда баён қилинган тушунтиришларни, эътирозларни ёки важларни текширишни белгиловчи соддалаштирилган тартибда иш юритиш механизми жорий қилинди.

Соддалаштирилган иш юритиш тартибида кўриб чиқилаётган иш аризани иш юритишга қабул қилиш ва иш қўзғатиш ҳақида ажрим чиқарилган кундан эътиборан 20 кундан ошмаган муддатда суд муҳокама ўтказмасдан, тарафларни чақиртирмасдан ва уларнинг тушунтиришларини эшитмасдан кўриб чиқади.

Эндиликда шикоятларга ҳамда суд ҳужжатини янги очилган ҳолатлар бўйича қайта кўриш тўғрисидаги аризаларга иш бўйича қабул қилинган суд қарорларининг тасдиқланган кўчирма нусхаларини илова қилиш талаби амалдан чиқарилади.