Марказий сайлов комиссиясининг Ўзбекистон Республикаси Олий Мажлиси Қонунчилик палатаси, халқ депутатлари вилоят, туман ва шаҳар Кенгашлари сайловига тайёргарлик кўриш ҳамда уни ўтказиш билан боғлиқ навбатдаги мажлисида сиёсий партияларнинг сайловда иштирок этишига рухсат берилди. Бу ҳақда Марказий Сайлов комиссияси матбуот хизмати маълум қилди.

Маълум бўлишича, Ўзбекистон Либерал-демократик партияси, «Миллий тикланиш» демократик партиясидан ва Ўзбекистон Экологик партиясидан 16 август куни; Ўзбекистон Халқ демократик партиясидан ва Ўзбекистон «Адолат» социал демократик партиясидан 17 август куни сайловда иштирок этишга ижозат бериш тўғрисидаги аризалар «E-saylov» ахборот тизими орқали Марказий сайлов комиссиясига келиб тушган.

Қайд этилишича, сиёсий партияларнинг аризалари тақдим этилган куннинг ўзида уларнинг ваколатли вакиллари ўз партияларининг сайловда иштирок этишини қўллаб-қувватловчи сайловчиларнинг имзоси қўйилган имзо варақаларини Марказий сайлов комиссиясига топширган.

Маълумки, Сайлов кодексининг 31-моддасига асосан Қонунчилик палатаси депутатларининг ягона сайлов округи бўйича сайловида сайлов бюллетенига унда иштирок этаётган сиёсий партияларнинг номи, рамзий белгиси уларнинг сайловда иштирок этиши учун ижозат берилган навбатига мувофиқ кетма-кетликда киритилади.

Шу тариқа, депутатлар қуйидагича кетма-кетликда партияларни тасдиқлади:

1) Тадбиркорлар ва ишбилармонлар ҳаракати – Ўзбекистон Либерал-демократик партияси;

2) Ўзбекистон «Миллий тикланиш» демократик партияси;

3) Ўзбекистон Экологик партияси;

4) Ўзбекистон Халқ демократик партияси;

5) Ўзбекистон «Адолат» социал демократик партияси.

Аввалроқ, 18 ёшли ўзбекистонлик шахматчи Магнус Карлсенни 3 дақиқада таслим қилганди.