Фото: Президент матбуот хизмати

Ўзбекистон Президенти Шавкат Мирзиёев Тинчлик кенгашининг илк йиғилишида иштирок этади. Бу ҳақда «Ўзбекистон 24» телеканалининг «Таҳлилнома» дастурида хабар берилди.

Учрашув 19 февраль куни АҚШ пойтахти Вашингтон шаҳрида жойлашган «Donald Institute of Peace»да бўлиб ўтиши кутилмоқда.

Таъкидланганидек, кенгаш фаолияти Ўзбекистонга глобал жараёнларда фаол иштирок этиш, ишончли ҳамкор ва конструктив давлат сифатидаги нуфузини мустаҳкамлаш имконини беради.

Эслатиб ўтамиз, Ўзбекистон Республикаси Президенти Шавкат Мирзиёев 22 январь куни Швейцариянинг Давос шаҳрида Тинчлик кенгаши Низомини имзолаш маросимида иштирок этди.

АҚШ Президенти Дональд Трамп раислигида ўтган тадбирда Аргентина, Арманистон, Баҳрайн, Болгария, Индонезия, Иордания, Марокаш, Мўғулистон, Озарбайжон, Парагвай, Покистон, Қатар, Қозоғистон, Саудия Арабистони, Туркия, Венгрия ва бошқа давлатлар раҳбарлари, бош вазирлари ва ташқи ишлар вазирлари ҳам қатнашди.

Янги тузилма БМТнинг Хавфсизлик Кенгаши резолюцияси билан қўллаб-қувватланган Ғазо секторидаги можарони тугатиш бўйича комплекс режани амалга ошириш доирасида шакллантирилмоқда.