Шу йилнинг октябрь ойида экран юзини кўриши режалаштирилган режиссёр Мухлиса Азизованинг «Scorpion» бадиий фильмнинг суратга олиш ишлари айни дамда Марокаш давлати ҳудудида бўлиб ўтмоқда. Бу ҳақда Кинематографияни ривожлантириш маркази матбуот хизмати маълум қилди.

«Scorpion» бадиий фильмининг Марокашдаги блоги учун 10 нафардан ортиқ марокашлик машҳур актёрлар, жами бўлиб 40 кишилик ижодий гуруҳ суратга олиш майдонида ишлаяпти. Оммавий саҳналарга эса 200 киши жалб этилган. Фильмда бирорта ҳам тасодифий кадр йўқ, оммавий саҳналар ҳам махсус амалга оширилмоқда.

Марокаш полицияси суратга олиш майдонидаги хавфсизликни тўлиқ таъминлаш учун жалб этилган. Аэропорт, темир йўл вокзали, Марракеш шаҳрининг «эски шаҳар» қисмида йирик масштабдаги суратга олиш ишлари давом этяпти.

Қайд этиш лозимки, суратга олиш ишлари Ўзбекистон кинокомиссиясининг бевосита кўмаги ҳамда Марокашнинг машҳур кинокомпанияси «Magic production» ҳамкорлигида бўлиб ўтмоқда.

«Scorpion» фильмининг суратга олиш ишлари Россиянинг Санкт-Петербург шаҳрида давом этади. Мазкур филм Ёшлар иттифоқи, «Ўзбеккино» миллий агентлиги, ички ишлар вазирлиги, Ўзбекистон миллий телерадиокомпанияси ҳамда кинематографияни ривожлантириш маркази томонидан суратга олинмоқда.