Россиялик шифокор-педиатр, инфекционист ва вакцинолог, "Лидер-Медицина" тиббий маркази бош шифокори Евгений Тимаков РФда ишлаб чиқилган коронавирусга қарши вакцина ҳақида маълумот берди, деб ёзади Спутник.

Қайд этилишича, Гамалея номидаги Илмий-тадқиқот маркази олимлари томонидан ишлаб чиқилган дори воситаси 12 август куни рўйхатга олинади. Ҳозирда синовнинг учинчи, якуний босқичи олиб борилмоқда.

Дори воситасини саноат кўламида ишлаб чиқариш сентябрда, коронавирусга қарши оммавий эмлаш эса Россияда октябрда бошланиши режалаштирилмоқда.

"Бу векторли вакцинадир, — дея қўшимча қилди Е.Тимаков. — Унинг истиқболи катта, у тирик вакцина сингари иммунитетни вужудга келтиради. У хавфсиз. Клиник синовларнинг биринчи босқичи ўтиб бўлди, ҳозирда вакцина Соғлиқни сақлаш вазирлигида клиник синовларнинг кейинги босқичига ўтиш учун рўйхатга олинмоқда. Энди одамларнинг катта миқдорида ўтказилади.

Унинг сўзларига кўра, аввалига маълум бир гуруҳга кирувчи кўнгиллилар эмланади. Бундан кейингина аҳолини оммавий эмлаш ҳақида гапириш мумкин бўлади. Бироқ мутахассиснинг фикрига кўра, бу тахминан 6 ойдан кейин амалга ошади.

"Ҳозирги кунда барча мамлакатларда вакциналарнинг клиник синовлари бўлиб ўтмоқда, — дея таъкидлади врач. — Табиийки, ким биринчи бўлиб катта гуруҳларда ушбу синовларни ўтказса, у биринчи бўлиб бозорга чиқади. Аммо, биринчи навбатда, у мамлакат эҳтиёжлари учун ишлатилади, ундан кейингина у бозорга чиқади. Биринчи бўлиб хавф гуруҳига кирувчи одамлар — коронавирус инфекцияси билан доимий мулоқотда бўлганлар, тиббиёт ходимлари, ўқитувчилар эмланади".