Россиядан келаётган таҳдид кучаймоқда — Латвия разведкаси
Латвия разведкаси Россиядан келаётган таҳдид кучаяётгани ҳақида огоҳлантирмоқда. Бу ҳақида BILD нашри маълум қилди.
Хабарда айтилишича, Латвия конституцияни ҳимоя қилиш бюроси томонидан эълон қилинган 2025 йилга мўлжалланган йиллик ҳисоботида Москвадан келаётган хатарлар нафақат Латвия, балки бутун Европа миқёсида ортиб бораётгани қайд этилган.
Мазкур ҳисоботда келтирилишича, ҳозирги вақтда Россия томонидан Латвияга нисбатан бевосита ҳарбий таҳдид мавжуд эмас. Бироқ разведка хизмати Россиянинг Латвия ва бошқа Ғарб давлатларига қарши кескин баёнотлари Москванинг узоқ муддатли стратегик режаларидан далолат бериши мумкинлигини билдирган.
Шунингдек, ҳужжатда Кремль Ғарбни тобора кўпроқ душман сифатида қабул қилаётгани ҳам қўшимча қилинган. Латвиялик таҳлилчилар Россия аллақачон ўзини Ғарб билан тўғридан-тўғри мафкуравий қарама-қаршиликда деб билишини таъкидлашмоқда.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг