Фото: Reuters

Оқ уй Миллий хавфсизлик кенгашининг стратегик алоқалар бўйича координатори Жон Кирби Россия Украинадаги можарода фойдаланиш учун Хитойдан қурол олмаётганини айтди.

«Биз ҳозирча Хитой ҳукумати Россияга ҳарбий ёрдам кўрсатишга қарор қилгани ҳақида ҳеч қандай аломат кўрмадик», дейди Кирби.

Олдинроқ, «Politico» нашри «ImportGenius» агрегатори тақдим этган савдо ва божхона маълумотларига таяниб Хитой компаниялари, жумладан, мамлакат ҳукуматига алоқадор бўлган компаниялар Россияга 1000 тага яқин автоматлар, шунингдек, ҳарбий мақсадларда фойдаланиш мумкин бўлган дрон қисмлари ва совутларни юборгани ҳақида хабар берган эди.

Нашрнинг қайд этишича, ушбу етказиб беришлар 2022 йилнинг июнь —декабрь ойларида амалга оширилган.

Қайд этилишича, Хитойнинг энг йирик давлат мудофаа пудратчиларидан бири «China North Industries Group Corporation Limited» ўтган йилнинг июнь ойида Американинг «Техкрим» компанияси ишлаб чиқарган «M-16» русумли милтиқлар намунасидаги «CQ-A» милтиқларини юборган.

Ҳисоб-фактураларда милтиқлар «фуқаролик ов милтиғи» деб ёзилган. Нашрнинг таъкидлашича, «CQ-A» Хитой ҳарбий полицияси, шунингдек, Филиппин, Жанубий Судан ва Парагвай қуролли кучлари томонидан қўлланилади.

Божхона маълумотларига кўра, 2022 йил охирида Россия томони Хитойдан учувчисиз учадиган қурилмалар учун 12 партия эҳтиёт қисмлар, шунингдек, Туркия орқали жўнатилган 12 тонна Хитой совутларини қабул қилиб олган.

Эслатиб ўтамиз, аввалроқ Хитой ташқи ишлар вазири Цин Ган Хитой Украинадаги можарода иштирок этмаслиги ва томонларнинг ҳеч бирига қурол бермаслигини айтган эди.

Унинг сўзларига кўра, Украина масаласида Пекин ҳар доим вазиятдан келиб чиққан ҳолда мустақил қарор қабул қилади. Дипломатнинг таъкидлашича, «тинчлик ва уруш ўртасида» Хитой «тинчликни танлайди», «мулоқот ва санкциялар ўртасида» эса «мулоқотни танлайди».